Trafikkdagen 2025 fekk ein heilt ny vri – men det small framleis godt!
Trafikkdagen 2025 blei arrangert i førre veke, denne gongen for alle elevar på skulen – i Bømlohallen. Sjølv om arrangementet var litt annleis, var målet med dagen som tidlegare å setta fokus på trafikktryggleik og å få elevane til å reflektera rundt konsekvensane av ikkje å ferdast i trafikken på ein sikker måte.
Rektor Tor Inge Kalstad ønskte først alle elevane velkommen, før turen gjekk vidare ned på Sirkusplassen.
Elevane fekk sjølv sjå kva krefter som er i sving når ein bil krasjar i 80 km/t. Det small godt då bilen som blei sloppe ned møtte asfalten.
Naudetatane demonstrerte kva som skjer under ei fullskala utrykking.
Både ambulanse, brannvesen og politi var på plass.
Brannvesenet demonstrerer korleis dei får opp døra til bilen ved hjelp av spesialutstyr.
Elevane kunne følga det heile på trygg avstand.
Tilbake i hallen tok Lene Hetland frå ambulansetenesta for seg kva ein skal gjera når ein kjem til ein ulykkesstad.
Elevane fekk trena på å sikra fri luftveg for pasienten. Dette er det aller viktigaste å sjekka når ein kjem til ein medvitslaus person.
På scenen sat rektor Tor Inge Kalstad, Alf Helge Greaker i Norsk motorcykkel union (NMCU), Lene Hetland i ambulansen, Stein Erik Hagenes i Sunnhordland Trafikkopplæring, Kristoffer Friis Isachsen i politiet, brannsjef Ove Halleraker og beredskapsleiar Frode Sagvaag i Bømlo brann og redning og svarte på spørsmål, samtidig som elevane blei utfordra på ulike spørsmål knytt til trafikktryggleik.
Til slutt fekk elevane moglegheit til å besøka ulika standar. Mellom anna var NAF på plass med sin "Bråstopp", der elevane fekk testa korleis det kjennest å krasja i 10 km/t. Utan bilbelte hadde dei ikkje hatt kjangs til å halda seg fast.